ХӨШИГНИЙ АРД: Н.Номтойбаярыг аврах кноп ӨНДӨР ҮНЭ хүрч, АН, ШИНЭ НАМ-д ашигтай тусав

 Н.Номтойбаяр гишүүнийг түдгэлзүүлэх эсэх Прокурорын хүсэлт хуулиараа 48 цагт багтан шийдэгдэх ёстой байсан ч УИХ-ын байнгын хороодоор 12 хоногийн дараа арайхийж оров. Уг нь УИХ-ын гишүүнийг эргүүлэн татах асуудал нь өөрөө онцлог учраас тодорхой байдлаар тохироо хийх, улстөрийн нөлөөлөл үүсэх эрсдлээс  сэргэлийлж, 48 цагт багтаан шийдэхээр хуульчилсан.Гэвч Н.Номтойбаярт энэ хуулийн түргэвчилсэн заалт огт үйлчилсэнгүй.

ШУДАРГА ҮНЭН ТӨРХТ Л.БОЛД Н.НОМТОЙБАЯРЫГ АВРАХ КНОП ДАРСАН УУ

Өнгөрсөн 12 хоногийн хугацаанд Н.Номтойбаярыг “авч үлдэх” тохироо ч хангалттай сайн хийгдсэнийг байнгын хороодын ТҮДГЭЛЗҮҮЛЭХ ШААРДЛАГАГҮЙ” гэж үзсэнээс харж болно. УИХ-ын гишүүний халдашгүй байдлын дэд хорооноос түдгэлзүүлэхийг дэмжсэн ч байнгын хороодын нууц санал хураалтаар Н.Номтойбаярыг “амилуулж” дөнгөлөө.

Илтэд муудахгүй байсан МАН-ын хоёр хуваагдал энэ өдрүүдэд дотоод тэмцлээ дахин эхлүүлж, М.Энхболдын талаас Д.Хаянхярваа, Ж.Мөнхбат, С.Бямбацогт, Ш.Раднаасэд тэргүүтэй гишүүд “Н.Номтойбаярыг үлдээх ажиллагаа”-г гардан зохион байгуулсан гэх мэдээлэл хөвөрч буй. УИХ-ын сонгууль, Ерөнхийлөгчийн сонгуулиар МАК-аас их хэмжээний хандив авсан улстөрчид ерөнхийдөө барьцаалагдсан гэх яриа ч хүчтэй хөвөрлөө.

Хошин нь, “Н.Номтойбаярыг үлдээх ажиллагаа”-нд өөрсдийгөө шударга үнэний дуу хоолой гэж тодорхойлдог “ШИНЭ НАМ”-ын Л.Болд, Ж.Батзандан нар нэгдсэн гэх хардлага бараг батлагдав. Тухайлахад, Л.Болд гишүүн “Хугацаа алдаж хууль зөрчсөн нь МАН+АН тохирох боломжийг бүрдүүлсэн. Үүнийг манай нам буруутгаж байгаа. Гэхдээ би хувь гишүүнийхээ зүгээс нууцаар саналаа өгнө” гэж ярьсан юм.

Өөрөөр хэлбэл, Л.Болд “МАНАН тохирч байхад би ч гэсэн яагаад болохгүй гэж” гэсэн үүднээс асуудалд хандаж буйгаа гэдгээ сэтгүүлчдэд бараг л илчлэв. Ойрх цагийн түүх сануулахад, У.Хүрэлсүхийн Засгийн газрыг унагах асуудал яригдаж байхад Л.Болд гишүүн тэдний талд кнопдох тохироо хийж, хувийн санхүүгийн шинжтэй том ажлаа амжуулсан гэхчлэн бичигдэж байв. Түүний тохирдог хэлбэр Н.Номтойбаяр дээр дахин үйлчлэв бололтой.

МАН-ЫН ХАГАРЛЫГ АН ОВЖНООР АШИГЛАЖ, КНОПОО ҮНЭД ХҮРГЭХ ТОХИРОО БҮРДЭВ

Дараачийн МАН-ын дотоод дайныг өөрсдөдөө ашигтай болгосон субьект бол АН. Хаалттай явагдсан байнгын хорооны үеэр Б.Пүрэвдорж гишүүн “Би өөрөө ийм байдалд орж үзсэн. Н.Номтойбаярыг ойлгож байна” гэх утга бүхий хамгаалсан байр суурь илэрхийлсэн хэмээгдэж буй. Харин хөшигний араас гарч ирээд,  сэтгүүлчдэд “Надад Н.Номтойбаярыг үлдээх шалтгаан байхгүй” гэж мэдэгдэж байх жишээтэй.

АН-аас Хуульзүйн байнгын хороонд С.Эрдэнэ, Б.Пүрэвдорж, Төрийн байгуулалтын байнгын хороонд Б.Наранхүү, Д.Эрдэнэбат нар багтдаг. Эдгээрээс ХББХ-н дээр У.Хүрэлсүхийн талынхан илтэд олон, ТББХ-нд М.Энхболдын талынхан олон билээ. Тэгэхээр Н.Номтойбаярыг аврах ажиллагаа хамгийн хүчтэйгээр ХББХ дээр явагдсан болж таарна. Энэ хороонд С.Эрдэнэ, Б.Пүрэвдоржоос гадна Л.Болд, Ж.Батзандан нар багтдаг. МАН аль нэг талдаа олонх болохын тулд эдгээрийн санал дээр ажилласан гэсэн үг.

Н.НОМТОЙБАЯРЫГ МАН-ААС “ХӨӨЖ”, ИЛ ХАМГААЛАГЧДЫГ НЭР ДЭВШИХ ЭРХТЭЙ НЬ ЯРИХААР ТУЛГАЖЭЭ

МАН-ын дарга У.Хүрэлсүх “Түдгэлзээд шалгуул” гэсэн байр сууриа бүлгийн хуралдаанаа үеэр Н.Номтойбаярт илэрхийлсэн байдаг.  Улмаар Н.Номтойбаярыг  “явуулах”  МАН-ынханд дээрээс нь ирж байгаа тул ил цагаанаар хамгаалахаас гишүүд айж буйгаа ч илэрхийлж байв.  Энэ нь тэдэнд нэг талаас нэр дэвших мандат намын даргаасаа авахад шууд эрсдэл үүсгэнэ.

Нөгөө талаас болж бүтэхгүй, орооцолдохгүй хэрэг гэж байхгүй Н.Номтойбаярыг ил өмөөрвөл олон нийтэд муухай харагдана. Эргээд сонгуулийн үеэр сөрөг пиараар өөрийнх нь эсрэг ашиглагдана гэж гишүүд хаширлаж байгаа юм. Яг ийм гишүүдийн айж бэмбэгнэсэн байдлыг мэдсэн юм шиг прокорорын хүсэлт нууцын дэгтэйгээр хэлэлцэхээр орж ирсэн байдаг.

Нэг ёсондоо нууцаар орж ирсэн нь айж бэмбэгнэсэн гишүүдийг Н.Номтойбаярын талд ажиллах таатай боломжийг бүрдүүлж буй. Ийм нөхцөл байдал дор маргааш Н.Номтойбаярыг түдгэлзүүлэхгүй гэсэн байнгын хороодын саналыг  чуулганаар хаалттай хэлэлцэнэ. Гарах үр дүн нь хууль зөрчиж, удаашруулсан 12 хоногт хэдийнэ шийдэгдчихсэн гэж харж болохоор.

“Хана хүртэл чихтэй” гэгддэг. Хэдий нууцаар санал хураалт явуулах ч Н.Номтойбаярыг хамгаалсан гишүүд МАН-ын дарга У.Хүрэлсүхийн нүүрийг харахад бэрхтэй болох нь ээ. Цаашлаад Н.Номтойбаярыг түдгэлзүүлэхгүй тохиолдолд МАН-аас хөөх асуудал хөшигний ард бараг л тодорхой болчихсон билээ.

Өөрийн сэтгэгдлээ илэрхийл

Share Tweet