ХЯНАЖ, ШАЛГАХ үүрэгтэй Б.Бат-Эрдэнэ, Т.Гантулга нар ТӨХК-ийн ТУЗ-д орохоосоо ИЧЭЭЧ

Манай том дарга ТӨХК-ийн ТУЗ-д орох асар өндөр хүсэлтэй байдаг. Учир нь, ТУЗ-ийн хурлаар өндөр дүнтэй мөнгөний ажлууд, санхүүгийн чанартай томоохон шийдвэрүүд, хийгдэх голлох ажлууд орж эцсийн байдлаар батлагддаг. Тэр ч утгаараа аль болох ТӨХК-ийн ТУЗ-д орж байж, ашигтай ажилладаг, дэмжсэн улстөрчийнхөө хувийн сонирхлыг гүйцэлдүүлдэг “нахаал” байдал тогтоод удаж буй.

Гэхдээ саяхан бүрэлдсэн “Эрдэнэс Тавантолгой” ТӨХК-ийн ТУЗ шиг шууд байдлаар эрх ашиг ханхалсан нөхдүүд нэг дор цугларах нь бас ховор. Хамгийн хачирхалтай нь, тус компанийн ТУЗ-д МХЕГ-ын дарга Т.Гантулга, ШӨХТГ-ын Б.Бат-Эрдэнэ нар багтжээ. Эд бол чиг үүргээрээ “Эрдэнэс Тавантолгой”-д хяналт тавих ёстой агентлаг толгойлсон хүмүүс. Тэгсэн компанийн эрх ашиг нэгтгэгддэг ТУЗ-д нь багтаад авчээ.

ТЭД ХЯНАЖ ШАЛГАХ БУС КОМПАНИЙН ЭРХ АШГИЙГ ХАМГААЛАХ ҮҮРЭГ ХҮЛЭЭНЭ

Компанийн тухай хуулиараа ТУЗ-ийн гишүүн байгууллагынхаа эрх ашгийг хамгаалах үүрэг хүлээдэг. Нэгэн үе эдийн засагч Ч.Отгочулууг Оюутолгой төслийг өмөөрч ярихаар “Монголын эрх ашгийг хамгаалсангүй, гадныханд худалдагдсан” хэмээн олон нийт буруутгадаг байв. Үнэндээ тэр хуулийн дагуу ТУЗ-ийн гишүүний хувиар Оюутолгой төслийг өмөөрөх үүрэг хүлээж байсан. Авууштай нь, тэр ШӨХТГ эсвэл МХЕГ-т даргын албан тушаалгүйгээр дан ганц Монголыг төлөөлж, Оюутолгойн ТУЗ-д ажиллаж байсан.

Одоо ШӨХТГ-ын дарга Б.Бат-Эрдэнийн статусаар жишээлье. Намар манай сүржин дарга “МИАТ” ТӨХК дээр хэвлэл дагуулж очиж байгаад л “Танайх тийзний үнээ буулга” хэмээн сүржигнэсэн. Төрийн агентлагийн дарга ТӨХК-иа тэгж дарамталж, шоудаж болдгийг олон нийт харсан. Харин тэр “Эрдэнэс Тавантолгой” ТӨХК дээр хэрэглэгчдийн эрх ашиг хохироход ингэж очиж орилох боломжгүй болжээ. Тэр ТУЗ-д сууж өндөр цалин “Эрдэнэс Тавантолгой”-гоос авахаас гадна эрх ашигтай олон шийдвэрүүд “захиалгаар” гаргахад оролцоно.

МХЕГ-ын дарга Т.Гантулгын өрөөнд “Эрдэнэс Тавантолгой”-н зөрчлийн актууд орж ирэхэд тэр гарын үсэг зурж чадах уу. Бас л “Эрдэнэс Тавантолгой”-гоос цалин авч, компанийн тухай хуулиар тэдний эрх ашгийг хамгаалах үүрэг хүлээж, ТУЗ дээр нь хамаг “нухаа”-гаа хийж суугаа хүн шүү дээ. Гацууртын Б.Чинбаттай нэг анги Т.Гантулга цагтаа олон тендер, зээлийн асуудлыг зохицуулж, авлига гээчийг цэцэглүүлэхэд зүй ёсоор оролцсон нэгэн гэгддэг. Төрийн тэргүүнээс өгсүүлээд Т.Бадамжунайн итгэлийг яаж ийгээд олж чаддаг эл эрхэм МХЕГ-ын даргын суудлаас хангалттай л их эрх ашгаа гүйцэлдүүлж чадмаар.

Өмнө нь ШӨХТГ, МХЕГ-ын удирдлагууд ТӨХК-ийн ТУЗ-д багтсан жишээ ер нь  сонсогдож байгаагүй. Т.Гантулга, Б.Бат-Эрдэнэ нар саяхан “ Улсын ерөнхий байцаагч” эрх авсан. Одоо хөхүүнээр “Эрдэнэс Тавантолгой”-н ТУЗ-д орж, байцаагчийн үүргээ гүйцэтгэнэ л гэж битгий хэлээрэй дээ. Түүн шиг худлаа юм байхгүй. Тэгээд ч ТУЗ-д хараат бус гишүүд гэж гурван хүн бий. Тэд чинь хяналтаа тавьж, олон нийтийн эрх ашгийг хамгаалж дуугарах үүргээр тус ТУЗ-д багтдаг юм.

Ер нь тэгээд шалгах, хянах чиг үүрэгтэй агентлагуудын дарга нар улаан шантаажчин болж, шууд байдлаар эрх ашигтай ажилладгийг нь Т.Гантулга, Б.Бат-Эрдэнэ нарын ТӨХК-ийн ТУЗ-д орсон жишээ олон нийтэд ил тодоор зарлаж өглөө. Т.Гантулга, Б.Бат-Эрдэнэ нар аа, амин хувийн наад захын шуналаа татаж чадахгүй, ТӨХК-ийн ТУЗ рүү чичирч яваа үйлдлээсээ ичээрэй. Та хоёр бол олон нийт талд үйлчлэх ёстой, бие даасан, хараат бус чиг үүрэгтэй агентлагийн дарга нар. Амь халуун энэ албан тушаал та хоёрын үед ингэж утгаа алдах гэж. АТГ ч нийтийн эрх ашиг зөрчигдөж мэдэх ийм томилгоон дээр зөвлөмжөө хүргүүлээсэй. ТӨХК-үүдийн ТУЗ-ийн бүрэлдэхүүнийг шалгаасай.

Энэ мэдээнд өгөх таны үнэлгээ

Хуваалцаарай Жиргээрэй