“T-ARA” хамтлагийг 90 минут тоглоно гэж маркетинг хийлгээд 6 дуу дуулуулжээ

БНСУ-ын алдартай хамтлагуудын нэг болох “T-ARA” Монголд хоёр дахь удаагаа ирлээ. Тэд энэ удаа “MON Entertainment” гэх газрын урилгаар ирж, тайзнаа гарав. Тоглолт өчигдөр Төв цэнгэлдэх хүрээлэнд болсон бөгөөд үнэнч сонсогч, шүтэн бишрэгч, үзэгчид нь сэтгэл дундуур байгаагаа илэрхийлсээр байна.

Учир нь тус хамтлагийг тайзнаа 90 минутын турш буюу нэг цаг 30 минут тоглолтоо толилууна гэж маркетинг хийж, сурталчилгаа, мэдээлэл цацсан. Гэвч зургаан дуу дуулаад дахин тайзнаа гарч ирээгүй аж.

Энэ тухай тоглолтын маркетинг талыг харицсан Я.Учрал,

“Сурталчилгаа хийлгэж байгаа баг хамт олондоо зохион байгуулагч компаниас худал мэдээлэл өгсөн үү. Эсвэл гэнэтийн асуудал хамтлагийн зүгээс гарав уу. Манай хамт олон маркетингийн ажил хийснээрээ ихээхэн хүндрэлтэй тулгарч байна.

Хэрэв дээрээс зориудаар бидэнд худал мэдээлэл өгч, бидний нэр нүүрээр ташаа мэдээлэл түгээлгэсэн бол энэ нь бидэнд ч хариуцлага нэхэх асуудал болж байна. Тиймээс бид зохион байгуулагч талаас албан ёсны тайлбар, хариуцлага нэхэж байна. Мөн үүнийг уншиж байгаа үзэгч,сонсогч та бүхнээсээ хүлээцтэй аль болох эелдэг байхыг хичээнгүйлэн хүсье” гэлээ.

Тус тоглолтын тасалбарын үнэ 150,000-800,000 төгрөг бөгөөд Монгол Улсаас оролцсон зочин артистууд тоглолтын талаас илүү хувьд дуулжээ.

Д.УЛСАА

Энэ мэдээнд өгөх таны үнэлгээ

Хуваалцаарай Жиргээрэй