Сэлбэ дэд төвийн тендерийн хэргээр саатуулагдсан Б.Сэргэлэнбаатар, Ш.Мөнхсайхан нарыг суллажээ

НИТХ-ын төлөөлөгч Б.Сэргэлэнбаатар, "Үнэн ба Зөв" намын ЕНБД асан Ш.Мөнхсайхан нарыг АТГ-аас 48 цагийн хугацаатай саатуулаад суллажээ.

Энэ талаар АТГ-аас "АТГ-ын Мөрдөн шалгах хэлтсээс 2026 оны 4 дүгээр сарын 23-ны өдөр “Сэлбэ хорин минутын хот” төслийн хүрээнд зарласан “Сэлбэ дэд төвийн орон сууцны иж бүрэн цогцолбор хороолол /71 айлын 9 давхар барилга, 6 блок 71 айлын 12 давхар, 8 блок/ Багц 4.2 төсөл арга хэмжээ”-г сонгон шалгаруулахдаа хууль зөрчсөн байж болзошгүй гэх гэмт хэргийн талаарх мэдээллийг хүлээн авч, хянан үзээд хэрэг бүртгэлтийн хэрэг нээн шалгаж байна.

Дээрх тендер шалгаруулалтад сонгон шалгарсан “Професионалстрой” ХХК-ийн 30 хувийн хувьцаа эзэмшигч, Нийслэлийн ИТХ-ын төлөөлөгч Б.Сэргэлэнбаатар, тус компанийн 70 хувийн хувьцаа эзэмшигч Ш.Мөнхсайхан нарыг прокурорын зөвшөөрлөөр Эрүүгийн хэрэг хянан шийдвэрлэх тухай хуулийн 31.5 дугаар зүйлийн 1.3 дахь хэсэгт заасан үндэслэлээр 2026 оны 4 дүгээр сарын 25-ны өдөр 48 цагийн хугацаагаар баривчилсан ба мөрдөн шалгах ажиллагааг үргэлжлүүлэн явуулж байна" гэв.

АТГ-ын бүрэн эрхийн хүрээн дэх 48 цагийн баривчилгааны хугацаа өнөөдөр дуусаж, тэднийг сулласан байна.

Үргэлжлүүлэн хорих санал ирсэн эсэхийг шүүхээс тодруулахад "Санал ирээгүй" хэмээсэн юм.

НИТХ-ын төлөөлөгч Б.Сэргэлэнбаатар “Професионалстрой” ХХК-ийн хувь эзэмшиж эхэлснээс сарын дараа “Сэлбэ дэд төв“-ийн 197.6 тэрбум төгрөгийн тендерт шалгарсан байдаг. Энэ талаарх мэдээллийг дараах линкээс унших боломжтой.

Г.МИШЭЭЛ

Өөрийн сэтгэгдлээ илэрхийл

Share Tweet