Ч.Улаан сайд 3.3 тэрбумын ашигтай ажилласан “ХААБ”-ийг ЯАМАНДАА АВЧ, Х.Баатарыг ажилтай нь ҮЛДЭЭЖЭЭ

Eguur.mn сайт саяхан “Ерөнхий сайд аа, ТӨБЗГ-ыг “амьгүй” болгож, бүлэглэлүүд ХУЛГАЙ ХИЙХ нөхцлөө бүрдүүлжээ” гэсэн гарчигтай нийтлэл бичиж, төрийн бодлого тодорхойлж суух учиртай сайд нар ТӨХК-иудыг яамныхаа харьяанд авахаар улайрдаг зохист бус үйлдлийг шүүмжлэн бичсэн билээ. Бид нийтлэлдээ Ц.Даваасүрэн сайд эрчим хүчний чиглэлийн ТӨХК-иудыг давуу эрхээр шилжүүлэн авсны дараа ЗТХ-ийн сайд Б.Энх-Амгалан зам засварын “АЗЗА” ТӨХК-иуд, “МИАТ”-ийг, УУХҮ-ийн сайд Д.Сумъяабазар газрын тос, уул уурхайн чиглэлийн өмчит байгууллагуудыг, ХХААХҮ-ийн сайд Ч.Улааныг “Хөдөө аж ахуйн бирж”-ийг тус тус авах санал гаргасныг дурдаж байв.

Улс төрийн сонгууль дөхөж буй энэ үед салбар хариуцсан сайд нар ТӨХК-иуд давуу эрх тогтоож, аж ахуйн ажил руу оролцож буй нь хөшигний ард дахь сонгуулийн мөнгө босгох нэг арга гэж хардах бүрэн үндэслэлтэй  билээ. Ийм байдлаар сайд нар улайран зүтгэж байгаа тул ТӨХК-иудыг яамныхаа харьяанд шилжүүлэх үйлдэл бодитоор ажил хэрэг болсоор байна.

УЛСТӨР: Х.БААТАР АЖИЛТАЙГАА ҮЛДЭЖ, Ч.УЛААН САЙД БАЯН БИРЖ СУГАНДАА ХАВЧУУЛАВ

Тухайлахад, ХХААХҮ-ийн сайд Ч.Улаан Засгийн газраар 2020.02.04-нд “Хөдөө аж ахуйн бирж”-ийг давуу эрхээр яамныхаа мэдэлд шилжүүлэн авах шийдвэр гаргуулжээ. Ингэснээр биржийн ТУЗ нь 70 хувийг  салбар яамнаас бүрдүүлж, тэдний олонхийн саналаар санхүү, эдийн засгийн чанартай томоохон шийдвэрүүд гарах нөхцөл байдал бүрдэж буй юм.

Энд улс төрийн талаасаа нэг сонирхолтой өнцөг байгаа нь, Ч.Улаан сайд ХААБ-ийн захирлаар ажиллаж буй Х.Баатар нар эртний “сайн найзууд”. Бүр тодруулж хэлбэл, Гаалийн Х.Баатарыг авлигын асуудалд орооцолдож явахад ард нь найз Ч.Улаан  байсан, өнгөн дээрээ “Би танихгүй” гэж хариулсан гэх яриа улстөрийн хүрээнд хөвөрдөг.

Ингэж алдаж, онож, сайндаж муудаж явсан нэгэн үеийн хоёр эдүгээ цагт харьцангуй амь нэгтэй.  Шинэ оноос өмнөхөн ТӨБЗГ-аас ХААБ дээр явуулсан шалгалтад үндэслэн, Х.Баатарыг албан тушаалаас нь чөлөөлөх чиглэлийг ТУЗ-д өгсөн байдаг. ТУЗ-ийн ирцийг ХААХҮЯ-ны төлөөллүүд бүрдүүлэхгүй гацааж, хөшигний ард Х.Баатарыг чөлөөлөх асуудлыг Ч.Улаан сайд эрс эсэргүүцсэн гэгдсэн.

Ийм байдлаар явсаар, ТУЗ нь  Х.Баатарыг чөлөөлөх асуудлыг хэлэлцэхгүй цаг хожих хооронд Ч.Улаан сайд биржийг яамны харьяанд давуу эрхээр шилжүүлэн авч буй юм. Үр дүнд нь, Х.Баатар ажлаа өгөхгүй, Ч.Улаан сайд 2019 онд 3.3 тэрбум цэвэр ашигтай ажилласан бланс бүхий баян биржийг сугандаа тас хавчуулж чадав.

ХААБ: ГАДНАА САНХҮҮ НЬ БЭХЖИЖ, ДОТООДДОО Х.БААТАР “ДУРААРАА ДУРГИСАН” ШИНЖТЭЙ УДИРДЖЭЭ

“ХААБ” ТӨХХК нь Х.Баатарыг ажлаа авч байхад санхүү нь хасах бланстай, урд хөршийн хэдэн компаниудтай маргаантай,  өр үүсгээд цалингаа тавьчихдаг, нэг ёсондоо “авах юмгүй” байгууллага байсан.  Тухайн үеийн УИХ-ын дарга М.Энхболдын өндөр нөлөөллөөр Х.Баатарыг захирлаар томилж, өнөөх нь ч сайн ажилласан.

Эдийн засгийн үзүүлэлтээс нь харахад, “ХААБ” ТӨХХК-ийн цэвэр ашгийн үзүүлэлт 2014-2016 он хүртэл 200-500 сая төгрөгийн хасах дүнтэй гарч байжээ.  Энэ үзүүлэлт 2017 оноос сэргэж, 2018 онд 1.2 тэрбум, 2019 онд 3.8 тэрбумын ашигтай ажиллах төсөөлөл батлуулсан байдаг. Улмаар урд хөршийн компаниудтайгаа ч учраа олж, гаднаасаа төвхийсөн айл болон төвхнөжээ.

Гэхдээ дотооддоо асуудал нь “буцалж”, Х.Баатар нэлээд дураараа удирдсан гэх гомдлууд гарсан уу гэвэл гарсан. Энгийн жишээ татахад, компанийн тухай хуулиар байгууллагын бүтцийн өөрчлөлтийг ТУЗ-өөр баталгаажуулан хэрэгжүүлдэг байхад Х.Баатар дур мэдэн, НАЙМАН УДАА бүтцээ өөрчилсөн байжээ.Тэрбээр дур мэдэн Ерөнхий менежер албан тушаалыг бий болгож, 37 ажилтан шинээр авахдаа нутгаасаа 13 хүн томилсон зэрэг  зөрчлүүд шалгалтаар илэрчээ.

Хамгийн ноцтой нь, ХААБ-ээр арилжигдсан түүхий эдийн тодорхойлолтыг урьдчилан ба нөхөн олголтоор нэлээдгүй ихийг тараасан байдал. Биржийн арилжаа өөрөө тухайлсан момент дээр явагддаг онцлогтой. Тийм байхад бичилтийг урьдчилан ба нөхөн олголтоор хийж, ханшийн зөрүүн дээр санхүүгийн тоглолт хийх “нарийн ухаан” ашигласан гэх хардлагад өртсөн нь анхаарал татав. Шалгалтаар 2017-2019 онд ний 21.4 тэрбум төгрөгийн өртөг бүхий 120.7 сая төгрөгийн шимтгэлтэй 39 биржийн тодорхойлолтыг урьдчилж олгосон байжээ.

ЭЦЭСТ НЬ, товч дүгнэж хэлэхэд “ХААБ” ТӨХХК нь ХХААХҮЯ-д  шилжсэнээр Х.Баатарт ч, Ч.Улаанд ч ашигтай тусахаар. Нэг нь ажилтайгаа үлдэж, нөгөө нь баян бирж дээр давуу эрхээ хэрэгжүүлнэ. Өнгөц харахад энэ асуудал төрийн өмч нэг агентлагаас нөгөө яам руу шилжиж буй  үзэгдэл. Гэвч хөшигний ард салбар хариуцсан сайдад ТӨХК-ийн гал тогоог ухах сайхан боломж олгож байгаа л хэлбэр юм. Уг нь тэд бодлого тодорхойлж суух ёстой. Харамсалтай нь, мэдэлдээ авсан ТӨХК-ийнхаа санхүү, хүний нөөцийг хэрхэн өөрийн дураар удирдах уу гэдэг дээр л сайд нар тархиа ажиллуулж буй жишиг энэ билээ.

Энэ мэдээнд өгөх таны үнэлгээ

Хуваалцаарай Жиргээрэй