С.Тайван: "Ноорог"-ийг хувь хүний нууцад халдаж, задруулсан, цахим мөрийтэй тоглоом зохион байгуулсан асуудлаар шалгасан

"Ноорог" медиаг ЦЕГ-ын Кибер гэмт хэрэгтэй тэмцэх хэлтсээс шалгаж, мэдүүлэг авсан талаар цагдаагийн байгууллагаас мэдээлэл өглөө.

ЦЕГ-ын Хэвлэл мэдээлэл, олон нийттэй харилцах хэлтсийн дарга Г.Пүрэвдэлгэр,

"Юуны өмнө “Ноорог” цахим хаягийн хэвлэн нийтлэх үйл ажиллагаа, түүнд нийтлэгдсэн пост, бүтээдэг контенттой холбоотойгоор мөрдөн шалгах ажиллагаа явуулаагүй гэдгийг мэдэгдье” гэлээ.

Улмаар ЦЕГ-ын Кибер гэмт хэрэгтэй тэмцэх хэлтсийн дарга С.Тайван,

“Контент бүтээгч “Ноорог” медиатай холбоотой шалгалтын ажиллагааг явуулж байна.

Энэ нь хэвлэн нийтлэх үйл ажиллагаатай нь холбоогүй. Хувь хүний нууцад халдах, хувь хүний нууцыг задруулах, цахим мөрийтэй тоглоом зохион байгуулах гэмт хэргийн тодорхой сэжүүр бий учир цагдаагийн байгууллагаас холбогдох мөрдөн шалгах ажиллагааг прокурорын хяналт дор явсан.

Өчигдөр прокурорт танилцсаны үндсэн дээр мөрдөн шалгах ажиллагааг явуулсан. Найман иргэнийг дуудаж, мэдүүлэг тайлбар авах гэсэн боловч долоо нь өмгөөлөгчтэй мэдүүлэг өгөхийг хүссэн. Энэ хүсэлтийг нь хангаж, ажилласан. Хуулийн хүрээнд явагдсан. Иргэдтэй уулзах уулзалтыг Кибер гэмт хэрэгтэй тэмцэх газрын бүрэн камертай өрөөнд хийсэн. Хууль зөрчих боломж бололцоо байхгүй гэдгийг хэлье” гэлээ.

-Үндэсний эв нэгдлийг бусниулах агуулгатай зүйл заалтаар яагаад шалгасан гэгдсэн юм бэ?

-Тэр талаар сайн мэдэхгүй байна, цахим орчинд тийм мэдээллүүд гарсан. Мөрдөн шалгах ажиллагааны явцад баталгаажуулж авч үзнэ.

-Дуудлага мэдээллийг хаанаас авсан бэ?

-Мэдээллийн эх сурвалж янз бүр байдаг. Өдөртөө 100-150 мэдээлэл аваад хойшлуулшгүй ажиллагаа явуулдаг. Тэдгээрийн нэг. Энэ нь хэвлэн нийтлэх эрх чөлөөтэй холбоотой гэж харагдсанаар л олны анхаарлыг татаад байна.

-Өөрсдөд нь мэдэгдэлгүй, байгаа газар нь шууд очсон нь гүйцэтгэх ажиллагаа биш юм уу?

-Мөрдөн шалгах ажиллагааны так тик янз бүр, ярих боломжгүй.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй