Г.Азжаргал: Нүүрсний хулгайн хүрээнд нийт ₮5.4 тэрбумын авлига өгснийг тогтоосон

АТГ-ын дэд дарга Г.Азжаргал нүүрсний хулгайн гэх хэргийн мөрдөн шалгах ажиллагааны явцын талаар мэдээлэл өглөө.

Тэрбээр "ЭТТ ХК, "Тавантолгой төмөр зам" ХХК-ийн эрх бүхий албан тушаалтнууд:

• Тендер сонгон шалгаруулах
• Нүүрс худалдах, худалдан авах гэрээ байгуулах
• Нүүрс тээвэрлэх, олон улсын ачаа тээврийн С зөвшөөрөл олгох
• Нүүрс тээврийн төмөр замын барилгын ажил гүйцэтгэхдээ бусдад давуу байдал бий болгосон, хахууль авсан
• Үндэслэлгүйгээр хөрөнгөжсөн
• Хахууль авсан байж болзошгүй хэрэг бүртгэлтийн 11, мөрдөн байцаалтын долоон хэргийг шалгаж байна.

Мөрдөн байцаалтын долоон хэрэгт 47 объектод нэгжлэг хийсэн. 15 хүнийг хойшлуулшгүйгээр баривчилж, 10 хүнд цагдан хорих, таслан сэргийлэх арга хэмжээ авснаас өнөөдрийн байдлаар зургаан хүнийг үргэлжлүүлэн цагдан хорьж байна.

Нийт 30 хүнийг яллагдагчаар татсан. Тэднээс:

• Долоон хүнийг хахууль авах
• 16 хүнийг хахууль өгөх
• Таван хүнийг албан тушаалаа урвуулан ашиглаж, бусдад давуу байдал бий болгож, их хэмжээний хохирол учруулсан
• Хоёр хүнийг үндэслэлгүйгээр хөрөнгөжсөн хэргээр яллагдагчаар татсан.

Нийт албан тушаалтнууд 5.4 тэрбум төгрөгийн хахууль авсан нь тогтоогдоод байна.

Нүүрс борлуулалтын талаар: ЭТТ ХК 2018-2022 оны хооронд давхардсан тоогоор нүүрс борлуулалтын 633 гэрээ байгуулсан. Худалдан авах ажиллагааны талаар: Мөн хугацаанд 20 сая болон түүнээс дээш 576 ширхэг тендер зарлаж, гэрээ байгуулсан. Нүүрс тээврийн талаар: Өнөөдрийн байдлаар 398 хуулийн этгээд тээвэрлэлт хийсэн. Тэдний захирлуудын мэдээллийг прокурорын зөвшөөрөлтэйгөөр ил болгож байна" гэлээ.

Г.САНСАРМАА

Өөрийн сэтгэгдлээ илэрхийл

Share Tweet