Д.Амарбаясгалан: ЭТТ ХК-д зургаан сар онцгой дэглэм тогтоож, БЭТ-өөр Ж.Ганбатыг томиллоо

Засгийн газрын ээлжит хуралдаан үргэлжилж байна. Хуралдаанаар гаргасан шийдвэрийн талаар ЗГХЭГ-ын дарга Д.Амарбаясгалан мэдээллээ.

Тэрбээр “Засгийн газраас гадаад валютын нөөцийг нэмэгдүүлэх чиглэлд 362-р тогтоолыг баталсан. Энэ хүрээнд ЭТТ ХК-д 560 сая, “Эрдэнэт үйлдвэр” ТӨҮГ-т 300 сая ам.долларын нөөц бүрдүүлэх үүрэг чиглэл өгөгдсөн байдаг. Бусад уул уурхайн компаниудад ч борлуулалтын төлбөрөө татан төвлөрүүлэх үүрэг өгсөн байдаг.

Үүнтэй холбогдуулан, төлбөрийн тэнцлийн алдагдал өндөр байгаа энэ үед ЭТТ ХК-д зургаан сарын хугацаатай онцгой дэглэм тогтоож байна. Энэ хүрээнд тус компанийн үйл ажиллагааг сайжруулж, төлбөр тооцоог нэмэгдүүлэх үүрэг бүхий Засгийн газрын бүрэн эрхт төлөөлөгчөөр /БЭТ/ Сангийн Төрийн нарийн бичгийн дарга Ж.Ганбатыг томилж байна.

Онцгой дэглэм тогтоосон хугацаанд, бүрэн эрхт төлөөлөгч Ж.Ганбат нь дараах эрх, үүргийг хүлээнэ:

-Бүтэц зохион байгуулалтыг шинэчлэх, шаардлагатай бол томилж, чөлөөлөх

-Хөдөлмөрийн болон технологийн журам тогтоож, зөрчигчдөд хариуцлага хүлээлгэх

-Ордоос ачих, тээвэрлэх, худалдан борлуулах бүх үе шатанд хяналт сайжруулах

-Хөрөнгө оруулалтад хамтарсан хяналт шалгалт хийж ЗГ-т танилцуулах

-Гадаад валютын улсын нөөцийг нэмэгдүүлэх 362-р тогтоолыг хэрэгжүүлж ажиллах

-Онцгой дэглэмийн үр дүн, явц байдлыг сар бүр танилцуулах” гэлээ.

Г.САНСАРМАА

Өөрийн сэтгэгдлээ илэрхийл

Share Tweet