Эрх баригчдад өгөх мессеж: Иргэд энэ удаад гэрийн тань ҮҮДИЙГ ТОГШИВ

Жагсаал зөвхөн төв талбайд өрнөөд өнгөрөх бус, Их тэнгэрийн аманд, төрийн гурван өндөрлөгийн босгонд хүрдэг болжээ.

Нүүрсний хулгайн асуудал ил мэдээлэгдсэнээс хойш өнгөрсөн хугацаанд инфляц, үнийн өсөлтийн хүнд дарамтад удаан тэссэн иргэд дахин нэг удаа тэсэрлээ. Тэд өчигдөр төв талбайд 11.00 цагаас эхлэн жагсаж, орой нь Их тэнгэрийн аманд очив. Тэнд цагдаагийн хамгаалалт гарсан. Цагдаа нарын бамбайтай иргэд нүүр тулж, 2-3 цаг эсэргүүцлээ илэрхийлсэн юм.

Жагсагчдын тавьж буй шаардлага урьд өмнөхөөс төдийлөн ялгарах зүйл багатай байлаа. Зарим нь Засгийн газар огцрохыг, зарим нь тогтолцоо өөрчлөхийг, зарим нь нүүрсний хулгайг ил тод болгохыг шаардаж байв. Өөрөөр хэлбэл, нэгдмэл зохион байгуулалтгүй, хүрэх цэг нь тодорхой бус хэлбэр энэ удаад мөн адил ажиглагдлаа.

Харин жагсаал дунд оройлдог нам, улс төрийн хүчнүүд болон сошиал нөлөөлөгчид байсангүй. Энэ утгаараа арай цэвэр, эрүүл дүр зураг харагдсан. Тэд жагсагчдын шаардлагыг хайрцаглаж, өөр өөрсдийн мэдээлэл түгээх хэрэгслээр цацдаг учраас органик зорилго бүдгэрэх сул талтай байдаг. Энэ удаа тэд байсангүй, иргэд, залуус бас малчид жагслаа.

Мөн Их тэнгэрийн аманд очиж, шууд төрийн гурван өндөрлөгийн гэрийн үүдийг тогшсон нь онцлог байв. Өөрөөр хэлбэл иргэд зүгээр л төв талбай дээрээ жагсахыг бус, эздэд нь хүрч очихыг хүссэн нь хүчтэй шаардлага, эрмэлзэлтэй байгааг илтгэнэ. Хэрэв илүү том хэмжээний жагсаал болбол, тэд илүү хүчтэй, илүү дүрмийн бус аргыг сонгох дүр зураг ажиглагдав.

Мэдээж мэдлэг, мэдээлэл багатай иргэдийн ерөнхий суурь төрх ч харагдсан. Хөндөн тавьж буй нүүрсний хулгай, гадаадын хөрөнгө оруулалтыг зогсоох зэрэг асуудлууд нь ихээхэн гүн агуулгатай, үүн дээр өнөөгийн Засгийн газар урьд байгаагүйгээс шинэ өнгө төрхөөр ажиллааж байгаа онцлогтой. Харин бүхэл агуулгаараа, иргэд огт тайван, жаргалтай биш байна. Тэд эрх баригчдаас хариуцлага нэхээд, илүү олноор босож ирэхэд бэлэн байгаа нь энэ үйл явдлаас харагдлаа.

Харин эрх баригчид таг чиг байв.

Их тэнгэрийн аман дахь цагдаа нарын хамгаалалт дундаас нэгэн энгийн хувцастай иргэн гарч ирээд, манай сэтгүүлчийн биед халдаж, камерыг нь булаах оролдлого хийв. Тэгээд буцаад цагдаа нарын дунд оров. Үүнээс жагсаалыг болиулах, тараахын тулд эхлээд хэвлэл мэдээллийн "амыг барих" талаар төлөвлөж байв уу хэмээн хардаж ч болохоор байлаа. Ямартай ч Төрийн тусгай хамгаалалтын тухай хуулиа хэрэгжүүлэн, нэгдүгээр зэрэглэлийн хамгаалалттай бүсийг хамгаалж, ажил үүргээ биелүүлж буй цагдаа нарыг жагсагчид оройн 20.00 цагийн үед орхисон.

Жагсаал хэт экстрем болбол бас осолтой, далимдуулж улс төрийн ямар ч шийдвэр гарч магадгүй. Нөгөө талд Л.Оюун-Эрдэнийн Засгийн газар унавал тоглолт хийхээр төлөвлөгөөгөө зурсан улс төрийн бүлэглэл ч бий гэдгийг санууштай.

Өнөөдөр жагсаал үргэлжилнэ, зарим иргэд ажил хаяна. Жагсагчид шаардлагаа илүү нарийсгаж, тодорхой зүйл заалт руу базаж, бодит өөрчлөлт нэхээсэй. Түүнд нь эрх баригчид ардчилсан нийгмийн онцлогийг илэрхийлж, дорвитой, шууд өөрчлөлт хийгээсэй.

Хамгийн гол нь албан тушаал, эрх мэдэл мөнх бус гэдгийг, иргэд нь туйлдсаар буй гэдгийг нэг эргэн санаж, мөнхийн мэт хийрхлээ эргэж хараасай.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй