Япон улсад өнгөрсөн жил “мах идэгч” гэгддэг стрептококк A төрлийн бактерийн халдвар хүндрэх тохиолдол түүхэнд байгаагүй их хэмжээгээр бүртгэгджээ. Тодруулбал 2023 онд стрептококкийн хордлогын шокийн хам шинж (STSS) Японд 941 удаа бүртгэгдсэн байна.
Маш ховор тохиолддог STSS-ийг стрептококк А буюу стрептококк пиоженес бактери үүсгэдэг. Тус бактерийн халдвар ихэнхдээ ямар нэгэн асуудал үүсгэдэггүй. Гэвч стрептококкийн халдвар STSS болж хүндэрсэн хүмүүсийн 30 хувь нь амьсгал хураадаг юм.
Стрептококк А нь үхжилт фасцит гэдэг өвчний үүсгэдэг голлох бактери тул “мах идэгч” гэж нэрлэгдсэн байна. Үхжилт фасцитын үед булчингийн хальс болон арьсны хамгийн гүн бүрхүүлд эдийн үхжил үүсдэг.
Тэгвэл 2024 он гарснаас хойш STSS-ийн тохиолдол их хэмжээгээр бүртгэгдсээр байна.Тухайлбал энэ жилийн эхний хоёр сард стрептококкийн хүндрэл 378 удаа бүртгэгджээ. Мэргэжилтнүүд энэ жилийн төгсгөл гэхэд STSS-ийн тохиолдол 2023 оныхоос давна гэж тооцоолж байна.
Одоогийн байдлаар Японы эрүүл мэндийн салбарынхан стрептококкийн хүндрэл нэмэгдэж байгаа шалтгааныг тогтоогоогүй байгаа юм. Бүртгэгдэж буй хүндрэлийн ихэнх нь 50-аас дээш насны иргэд байгаа аж.
STSS-ийн үед хоолой сөөх, халуурах, гүйлгэх, бөөлжих шинж тэмдэг илэрдэг байна. Японы Эрүүл мэндийн яам иргэддээ халдвар хамгааллын дэглэм сахихыг зөвлөжээ.
Эх сурвалж: The Guardian
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Манайхаас холуур өнгөрөг