БЗД-ийн Засаг дарга Н.Баярмөнх УОК-ын шийдвэрээр хөдөө “хоригдсон” ажилтнаа АЖЛААС ХАЛЖЭЭ

Баянзүрх дүүрэгт найман жил засагласан АН 2020 оны сонгуульд ялагдал хүлээсэн. Одоо тус дүүрэг МАН-ын мэдлийнх болсон.

Сонгуулиас сонгуульд, нам солигдоход өмнө нь ажиллаж байсан олон зуун хүн ажилгүй болж, хүчээр ажлаа өгдөг төрийн албаны завхрал ил цагаан үргэлжилсээр байна.

Тухайлбал тус дүүргийн 26-р хорооны Засаг дарга болох АН-ын гишүүнчлэлтэй Г.Отгонбаатар гэх залуу ажлаа өг гэсэн удаа дараагийн шахалтаас болж ажлаа өгсөн талаар өчигдөр хэвлэлүүдэд мэдээлэв. Түүнчлэн Г.Отгонбаатарыг буцааж ажилд нь оруулахыг хорооны иргэд шаардаж багахан хэмжээний жагсаал ч зохион байгуулаад авлаа. Төрийн албаны залгамж чанарыг алдагдуулж буй эл үйлдэл үргэлжилсээр. Эцэстээ төрийн албаа хальж, аж ахуйн алба руугаа орсон бололтой.

-ИРГЭН Ж УЛААНБААТАР ХОТ РУУ ИРЖ ЧАДАХГҮЙ, ДОРНОД АЙМАГТ БҮТЭН САР БОЛЖЭЭ-

Тодруулбал Баянзүрх дүүргийн шинээр томилогдсон Засаг дарга  Н.Баярмөнх тушаал гаргаж, Баянзүрх дүүргийн аж ахуйн албанд олон жил ажилласан, тодруулбал АН-ын үед ажиллаж байсан жолоочийг ажлаас нь халжээ.

Юу болсныг сийрүүлбэл тус дүүргийн аж ахуйн албанд 2013 оноос хойш жолоочоор ажиллаж буй Ж нь 2020 оны 11-р сарын 09-нд буюу Монгол Улс дотооддоо коронавирусийн халдвар алдлаа гэж зарлаж, хөл хорихоос хоёрхон хоногийн өмнө даргаасаа гурав хоногийн чөлөө авч, хувийн ажлаар хөдөө явжээ.

Гэтэл хоёр хоногийн дараа буюу 11-р сарын 11-нд манай улсад халдвар алдсан нь ил болж, Улсын хэмжээнд хөл хорио тогтоосон байдаг. Тиймээс жолооч Ж Улаанбаатар хот руу орох боломжгүй болж, Дорнод аймагт 12-р сарын 02 хүртэл хоригдсон байна. Тухайн үед ийм байдалд орсноо ажил руугаа хэлж, аймгийн онцгой комиссоос тодорхойлолт хүртэл авч явуулсан байна.

Гэтэл  Баянзүрх дүүргийн Засаг дарга Н.Баярмөнхийн тушаалаар 2020 оны 12-р сарын 04-ний өдрийн Б/347 тоот тушаалаар ажлын байр удаан хугацаанд, шалтгаангүйгээр хаяж явсан гэдэг үндэслэлээр түүнийг ажлаас чөлөөлсөн байна. Хөдөлмөрийн тухай хуульд ажилтан хөдөлмөрийн сахилгын зөрчил давтан гаргасан, эсхүл хөдөлмөрийн харилцааг шууд зогсоохоор хөдөлмөрийн гэрээнд тухайлан заасан ноцтой зөрчил гаргасан тохиолдолд ажлаас халдаг. Гэтэл улс даяар гаргасан шийдвэрээс болж нэгэн иргэн ийн хохирч, ажилгүй болжээ. Тиймээс иргэн Ж эл асуудлаар Баянзүрх дүүргийн иргэний хэргийн анхан шатны шүүхэд хандсан байна. Баянзүрх дүүргийн Засаг даргын тамгын газрын зүгээс шүүхэд тайлбар гаргахдаа иргэн Ж-г гурав хоногийн чөлөөний хуудас хуурамчаар үйлдсэн хэмээн мэдүүлсэн байх юм.

-ШҮҮХЭЭС ЗАСАГ ДАРГА Н.БАЯРМӨНХИЙН ТУШААЛЫГ ХУУЛЬ БУС ГЭЖ ҮЗЖЭЭ-

Эл хэргийн анхан шатны шүүх өнгөрсөн хоёрдугаар сарын 23-нд болж, иргэн Ж-г ажлаас халдсан Баянзүрх дүүргийн засаг дарга Н.Баярмөнхийн тушаалыг хууль бус гэж үзсэн байна.

Тодруулбал Ж-г хүндэтгэн үзэх шалтгааны улмаас ажил үүргээ гүйцэтгэх боломжгүй нөхцөл байдалд байсан гэж үзэж БЗДЗДТГазарт жолоочийн ажилд эгүүлэн тогтоож, ажилгүй байсан хугацааны цалинг олгох үндэслэлтэй байна гэж шүүх үзсэн юм.

Гэхдээ шүүхийн процесс дуусаагүй. Баянзүрх дүүргийн Засаг даргын тамгын газраас эл шийдвэрийг хүлээн зөвшөөрөхгүй, буруугаа хүлээхгүй бол Давж заалдах эрхтэй. Цаашлаад дээд шүүхэд ч хандах эрхтэй юм.

Б.ЦЭЛМЭГ

Энэ мэдээнд өгөх таны үнэлгээ

Хуваалцаарай Жиргээрэй