“Өвөө нь уйлав” постны эзэн Н.Мөнхтөр: Хүү эмнэлгээс гарах гээд гэрээ цэвэрлэж, шалаа угаагаад хүлээж байна

Нийгмийн сүлжээнд эмнэлэгт хэвтэж байгаа 10 сартай зээгээ эргэж ирээд уйлж байгаа өвөөгийн зураг нийтлэгдсэн нь олны анхаарлыг татаж байна. Өвөө “... эмнэлэгийн том, том зүү миний муу хүүг хатгаад уйлахаар өөрийн эрхгүй нулимс гараад байна. Өвөө нь хүүдээ шинэ хонины гуя авсан эмнэлэгээс гарахаар нь шөл хийж өгнө. Одоо миний хүүгийн ханиад нус эдгээд эмнэлэгээс гардаг л юм бол гэртээ хариад хэнийг ч гэртээ оруулахгүй хаалганыхаа гадаа улаан утас татна” хэмээн цонхны цаанаас хүүтэйгээ ярьж байгаад явдаг тухай охин нь бичсэн билээ.

Бид “Өвөө нь уйлав” нийтлэлийн эзэн Н.Мөнхтөртэй ярилцлаа.

-Таны зээгээ эргэж ирээд уйлдаг тухай мэдээлэл олонд хүрсэн. Танаас зарим зүйлийг тодруулж асуух гэсэн юмаа?

-Болдог л юмбол тэгээ, миний хүү.

-Хүүхэд тань хэзээ эмнэлэгт хэвтсэн бэ. Таныг уйлдаг гэхээр удсан юм болов уу гэж бодсон юм?

-Миний том охины бага хүү 10 сартай. Муухай ханиад хүрч, эмнэлэгт хэвтээд тав хонож байна. Ах нь их өрөвчхөн, зөөлөн сэтгэлтэй хүн. Үүнийгээ нас яваад мэдэж байна. Хэдэн ач, зээгээ харахаар өөрийн эрхгүй нулимс урсчихдаг. Манайх 1 хүү, хоёр охинтой. Тэдний минь хүүхдүүд  2 хүү, 3 охин таван ач зээтэй. Эмнэлэгт байгаа нь бид хоёрын хамгийн бага зээ. Төрөөд хоёр сартай байхдаа өвөө, эмээ дээрээ ирсэн. Бид хоёр хүүгээ хамрын ханиад хүргэхгүй өдий хүргэсэн. Тэгсэн сүүлд ах, эгч нь бөөнөөрөө ирээд бужигнаад хүү минь ханиад хүрчихлээ.

-Тэгээд та улаан утас татаад хэнийг ч оруулахгүй гэсэн юмуу?

-Тэгсэн. Өнөөдөр хүү минь эмнэлгээс гарна гээд эмээ, өвөө хоёр нь гэр орноо цэвэрлээд, шалаа угааж байна. Нэг хэсэгтээ хэнийг ч оруулахгүй ээ. Хүү минь өвдчихөөр бүтэн нойртой ч хоносонгүй.

-Бусад ач, зээ тань гомдох вий. Шинэ жилээ тэмдэглэнэ биз дээ?

-Миний хүүхдүүд ухаантай ойлгоно. Үр хүүхдээ тойруулаад бужигнаж суухаас өөр жаргал юм билээ. Гэхдээ энэ ханиадыг татартал хөөрхөн хүүгээ бодно. Эмээ, өвөө, хүү гурав буузаа жигнээд, махаа чанаад баяраа тэмдэглэх хөтөлбөр бий.

-Та ханиад хүргээгүй өдий хүргэсэн гэлээ. Арга туршлагаасаа хуваалцаач?

-Бид хоёр хүүгээ нэг их дулаалж, бигнээд байдаггүй.  Хөнгөн нимгэндүү хувцастай, тэгээд уячихдаг. Хүн болгон барьж аваад үнсээд, тоглоод байдаггүй амар. Ер нь бол хүүхдийн уях өлзий дэмбэрэлтэй, урт наслуулдаг гэж хөгшчүүл ярьдаг. Ах нь хэдэн хүүхдээ уяж л хүн болгосон. Миний хүү чинь өвөө, эмээ хоёртойгоо Дархан, Сэлэнгэ, зуслан гээд хаа сайгүй явна. Чийрэг, борогшуу сайн хүү байгаа юм.

-Та ач, зээгээ их эрхлүүлдэг бололтой?

-Тэгэлгүй яахав. Хүний амьдралын утга учир чинь ерөөсөө ач, зээ байдаг юм байна. Энэ хэдийгээ харахаар хайр хүрээд, нулимс урсаад сүйд болдог. Миний охидууд чинь өвөөгөө хэвтүүлж байгаад нүүр будна. Ямарсайндаа хүн хаалга цохихоор будагтай нүүртэйгээ очиж онгойлгоод зочноо айлгаж байхав. Сайхан даа хүний амьдрал.

-Ярилцсанд баярлалаа.  

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй